政壇：波波反駁人口換血

仲記得政府喺本年度施政報告提出放寬「一般就業政策」、「輸入內地人才計劃」同「優秀人才入境計劃」下嘅逗留安排，並研究制訂人才清單嘅可行性，當時泛民多名主打本土議題嘅議員，先後質疑政府進行人口換血，政務司司長林鄭月娥隨即反駁，呢啲偏激言論係危言聳聽、分化社會。

事隔多時，波波疑借題發揮，借早前聯同百多人出席內地與香港建築論壇時見到唔青少年新面孔，主動提及近年香港有部分人對上一代所指嘅「獅子山下精神」嗤之以鼻，認為上一代人嘅成功主要係因緣際會因素，而今日再單純鼓勵年輕人奮發，只係無視依家社會發展機會不公平嘅問題。

倡港青拓視野迎挑戰

就此，波波強調唔應該將問題過分簡化，將唔同年代嘅香港人二元對立起來，更不應該隨便以「一蟹不如一蟹」去批評今日嘅年輕人。佢續指，隨着國家嘅發展需要不斷提升及轉型，特別係「一帶一路」倡議下，對各類專業服務同人才需求只會有增無減，年輕人仍有一定發展空間喎。

波波其後又隔空回應本土派嘅「換血論」，指現今競爭全球化，世界各地人才都係高度流動，香港一直以嚟對世界各地人才保持開放，呢個亦係香港多年嚟賴以成功嘅因素之一。佢建議本港年輕人更應該拓闊視野，保持迎接挑戰嘅信心，尋求最適合自己嘅發展空間。波波苦口婆心隔空反駁，唔知又有幾多人聽得入耳呢？