中環唔止係香港嘅心臟地帶,更加係國際金融中心,平日熙來攘往,人流如鯽。不過咁,一到咗星期日,成個中環即刻淪為南亞兵團嘅天下,金融中心變咗小販中心,都唔知幾墟冚。

唔係誇張o架,最近每逢假日,中環及金鐘一帶就出現大批南亞裔小販兵團,佢哋專向外傭兜售衣服及日用品,搞到烏煙瘴氣,七國咁亂,連食環署小販管理隊都無晒符,幾乎要扯白旗投降咁滯。

呢,本報記者到現場睇過,大約十名食環署販管隊職員係威係勢想拘捕無牌小販,點知南亞兵團有「天文台」通水,無牌小販收到風,紛紛作鳥獸散,搞到食環署職員食白果,乘興而去,空手而回,你話係咪失威吖!

鬼咩,面對人多勢眾嘅南亞小販大軍,食環署毫無戰術可言,唔單止冇增派人手支援,反而抽調人手去其他區執勤,搞到中環一帶只有約十名職員駐守,雙方兵力懸殊,小販兵團梗係當食環署無到啦。

仲有吖,因為多數南亞裔小販係持「行街紙」嘅酷刑聲請者,每次被捕時例牌暴力反抗,食環署人員無任何自衞裝備,焗住赤手空拳衝鋒陷陣,受傷成為家常便飯,甚至有職員遇襲身亡添。食環署官僚置前線人員安危於不顧,唔係靠害又係乜呀。

係人都知,呢啲酷刑聲請者九成九係假難民,做無牌小販仲係小事,有啲假難民為非作歹,帶來各種社會及治安問題至係大件事呀。有眼你睇o架,近年有關酷刑聲請者嘅負面新聞多不勝數,有人搶劫,有人販毒,有人打交,有人持刀傷人,有人做「租霸」,仲有人燒古蹟添,搞到治安愈來愈差,市民出入提心吊膽,都咪話唔閉翳。

正所謂,長貧難顧。面對源源不絕嘅難民潮,全球各地如臨大敵,紛紛急謀對策,連歐洲國家都要大幅收緊難民政策。偏偏港府假仁假義,中門大開,搞到香港好似無掩雞籠咁,假難民愈來愈多,港府相關支出年年上升,今個年度已超過六億元。港府請客,納稅人埋單,擺明搵笨啦。

前事不忘,後事之師,當年越南難民問題搞到香港雞毛鴨血,幾乎失控咁滯,唔通港產官僚咁快就忘記慘痛教訓?計太一叮話齋,假難民易請難送,再咁落去,唔止中環淪為南亞裔小販中心,成個香港都遲早淪陷吖,叮!