政壇：健釗長老與眾同樂 「佛你跑」
寶蓮禪寺尋日朝早喺大嶼山昂坪舉辦首屆越野跑賽事「佛你跑」，過千名老少跑手分別參與二公里、六公里以及八公里賽事，以昂坪地壇廣場作為起點及終點，參賽者需在限時內完成賽事。負責籌辦賽事、六十九歲的寶蓮寺健釗長老和心慧法師亦與眾同樂，一同參與賽事，並聯同其他十四位法師齊齊體驗八公里及六公里賽事。
健釗長老身體力行參加八公里賽事，真係唔話得。（受訪者提供圖片）
健釗長老身體力行推廣運動嘅好處，最後以一小時三十二分完成八公里賽事，以佢嘅年齡嚟講，呢個成績真係叻過好多人喎。
主辦方好有心，為越野跑嘅參賽者提供唔少獎項，例如每組首十名得獎者可免費享用寶蓮禪寺午齋，而大會亦會將每個參賽單位參賽費當中的一百元，撥捐慈善機構。
