慳電慳到出神入化嘅環境局局長黃錦星(星星),上半年曾自爆為屋企定下家規,規定晚上氣溫達攝氏二十八度先可以開睡房冷氣,多得一家四口都有嚴格遵守,今年四月電費只需繳交一百二十元。事隔半年,尋日星星屋企電費再創新低,又再自爆上月電費只需一百零一元。明明上月仲有啲日子高過二十八度,符合黃氏一家開冷氣要求,照計電費應該同半年前差唔多,究竟每月一百零一元電費單是怎樣煉成?

黃錦星

星星話,盡量開少啲冷氣就最有效,又建議市民最好揀番貼有一級能源標籤嘅雪櫃,因為雪櫃長時間耗電,如果揀能源效益較高嘅產品,累積慳到嘅電自然就愈多啦。被問到天然氣價格較低,會否影響來年電費,星星話能源價格係調整電費水平嘅考慮因素之一,下月港府會同兩間電力公司進行周年電費檢討,市民好快知道來年電費調整。

第一手消息請下載on.cc東網iPhone/iPad/Android/Windows Phone Apps