政壇：搞搞政：TSA公聽會拉鋸 大輝吳得掂過招
小三全港性系統評估（TSA）應否取消引起熱議，立法會教育事務委員會主席林大輝早前臨時決定本月二十九日舉行TSA公聽會，但教育局局長吳克儉（吳得掂）卻話有「私人理由」，無暇缺席，激到大輝紮紮跳！大輝跟住建議下月五日或六日再搞多場公聽會，吳得掂又話要下月十三日才能出席。一場公聽會都拉鋸咁耐，結果吳得掂捱轟，大輝亦冇得分噃。
大輝本月二日突然宣布決定於本月二十九日舉行TSA公聽會，但獲邀嘅吳得掂話有「私人理由」離港，出席唔到，大輝跟住寸爆吳得掂如果真係「好想嚟」，應該事在人為啫，但係佢都承認訂立公聽會時間前無考慮過局長嘅行程。吳得掂尋日話自己感到遺憾，反而建議可唔可以下月十三日？結果梗係唔得嘞。據局方知情人士透露，吳得掂本月二十九日及下月六日均獲批假離港，湊巧與兩場公聽會撞期，睇嚟吳得掂避過咗呢場公聽會。
教協會長斥「離岸局長」
不過，教協上周四發起取消TSA操練嘅家長及教師聯署，截至昨午已收到約四萬個聯署響應，佢哋打算本月二十一日聯署截止當日，舉行公開論壇，當日邀請學者分析TSA利弊。對於吳得掂本月底缺席公聽會，教協會長馮偉華直斥吳是「離岸局長」，「今次又再離岸，仲以私人理由唔出席，咁離岸，不如唔好返嚟，辭職啦」。
