政壇：楊偉雄連環甩轆
經歷長達三年半嘅拉布戰，創新及科技局（創科局）嘅撥款申請終於喺上周五嘅立法會財務委員會通過，創科局會喺本月二十日正式成立。預計會出任創科局局長嘅行政會議成員兼特首創新及科技顧問楊偉雄尋日出席活動頓成焦點，但佢多次避談係咪會出任局長，又強調自己少談政治，只做實事。不過，唔知係咪心情興奮，楊偉雄接受訪問時三次講錯自己係立法會議員（應為行會成員）；為活動致詞時又唔小心熄咪及收起投影機屏幕，最尷尬係佢唔識整番好，雖然呢啲唔算乜高科技，但楊偉雄咁多甩轆，明顯熱身不足喎。
做足十個月「無薪局長」
原本係理工大學副校長嘅楊偉雄，喺今年二月約滿後唔再續約，因而被盛傳係創科局局長大熱人選。由於創科局撥款遲遲未能通過，政府一次過委任佢擔任三項公職，包括行會非官守成員、創新及科技顧問，以及創新及科技諮詢委員會主席，但三項公職只有一項受薪，與任職大學或做局長相比，最少要減薪約三分之二。雖然楊偉雄未有局長之名，但就頻頻約見議員及相關團體，又曾帶團訪京，即係做足十個月「無薪局長」。
尋日楊偉雄被問到依家咁多政治爭拗，點樣可以少談政治時，佢就自稱以立法會議員身份做嘢，同議員有溝通；又話做對香港好嘅嘢，係佢做立法會議員嘅做法。當被追問有無做局長嘅意願，佢話一向想為香港做嘢，做立法會議員同創新及科技顧問都係為咗咁啫。三次講錯自己係立法會議員，唔通佢想做立法會多啲？
正所謂一不離二，楊偉雄接連「甩轆」，佢為活動致詞時唔小心熄咪及收起投影機屏幕，整完一輪都無起色，最終要工作人員幫手，對於可能會出任創科局局長嘅佢嚟講都幾尷尬，希望呢啲甩轆事到此為止啦！
