西諺話，條條大路通羅馬，可惜香港啱啱相反，唔係路路暢通，而係路路不通，尤其係紅磡過海隧道一年到尾塞到爆，簡直寸步難行，成為駕駛人士揮之不去嘅噩夢。如果你唔想浪費時間大排長龍，惟有浪費金錢選擇行東隧或西隧，任人宰割。

好嘞，左等右等之下，終於等到東隧合約就快屆滿，港府明年八月收回專營權，好多人以為會乘機減價喇，點知原來係一場歡喜一場空。尋日立法會通過一項無約束力動議，要求當局收回東隧後盡快調整收費，並將東隧及紅隧盈餘成立基金，作為政府收回西隧嘅經費，吸引更多市民使用西隧，平衡幾條隧道嘅車流，紓緩紅隧長期塞車嘅壓力。

呢項動議講出唔少市民嘅心聲，官老爺又點樣回應呢？運輸及房屋局局長張炳良話喎，收回東隧後可更大彈性設計隧道收費調整方案，合理分布三條過海隧道嘅交通流量；佢又話隧道擁有權和分流交通係兩回事，屆時隧道費及其他費用將維持不變。所以話，官字兩個口，講咗一大堆，帶人遊花園，其實答案只有三個字：唔減價。

係人都知，由於幾條過海隧道收費相差懸殊，車流量嚴重失衡，導致紅隧長年塞車，唔止引起交通混亂，而且增加社會成本，各界一直呼籲當局諗辦法解決問題，有人甚至藥石亂投，建議「東減紅加」添。而港產官僚就闊佬懶理，你有你講，佢有佢袖手旁觀。本來呢，東隧專營權屆滿，正係調整收費、分流車輛嘅最好時機，點知結果又係得個吉。

冇計啦，港產官僚無嘢叻，最叻就係拖字訣。張炳良聲稱要等到中環灣仔繞道通車之後，觀察一段時間至決定東隧係咪減價喎。咁就大劑咯，本港基建工程延誤早就成為家常便飯，中環灣仔繞道原定二○一七年通車，由於種種原因而一再延遲，隨時要拖多幾年都似，等得嚟蚊都瞓、蛇都死喇！到時張炳良可能已經告老還鄉，關人個關，你塞車係你嘅事，佢睬你都傻。

正所謂民生無小事，港產官僚講就天下無敵，做就有心無力，家陣連東隧減價咁簡單嘅事都唔肯做，強迫市民繼續忍受塞車之苦，你話係咪豈有此理吖。講到底，三隧分流唔係冇辦法，只係舉手之勞啫，可惜港產官僚大腦閉塞，比紅隧有過之而無不及，結果咪搞到路路不通囉，叮！