溥儀眼鏡老闆邱子傑尋日出席自家同丹麥品牌嘅預展，佢指好榮幸邀請到丹麥品牌首席設計師Mr. Henrik Lindberg親臨活動，又話同Mr. Lindberg合作多年，今次佢想o黎認識香港o既客人，親自介紹新系列。佢透露Mr. Lindberg經常邀請佢到丹麥，希望好好招待佢：「成日叫我過去，話好多o野好好食，但我一直未有機會去。」

邱子傑（左）同Mr. Lindberg尋日出席自家同丹麥品牌嘅預展。

問到聖誕節會唔會一家人去丹麥，順道旅行？向來工作為先嘅邱子傑又不禁話：「去旅行就唔做o野啦，今年計劃去北海道滑雪，前年一家人去韓國滑雪，第一日阿仔就整傷，今年預早o的去。我同太太都唔係好sporty，同小朋友去旅行，又無理由去歐洲shopping。」佢又透露即使一家人出國旅行，亦會同太太邱李茂琪偷走出去二人世界，佢話：「依家得我個女o係香港，所以間唔中都會兩個去日本旅行。」囡囡唔呷醋？佢話：「都OK，買多o的o野畀佢就冇問題！」

仔女青春期行為「老積」

講到子女踏入青春期，邱子傑話仔女冇出現反叛期，但行為「老積」：「兩個都乖o既，個女下年應該都出國留學，希望同大仔同一間，不過依家外國讀書都唔容易。太太同我都好掛住仔女o架，不過我成日飛去外國做o野，可以探佢o地。」問到大仔談戀愛未？佢話：「應該未，佢應該唔會同我傾，反而同妹妹傾。佢依家十五歲，都差唔多。」

第一手消息請下載on.cc東網iPhone/iPad/Android/Windows Phone Apps