城中鏡：玩味新發明
唔少政商界人士出席日前開幕嘅創新科技嘉年華，睇吓有咩新奇嘅發明。在場見到立法會工程界議員盧偉國對其中一張可以高低移動嘅座椅非常有興趣，原來只要坐喺張座椅上「(足辰)」吓「(足辰)」吓，就可以發電。盧偉國仲笑言，如果立法會換晒呢啲櫈，日後就算有議員玩「拉布」，佢哋都可以坐喺度發電，叫做有啲作為喎。
盧偉國（右）話議員「拉布」時可以坐發電座椅發電，左為鄭家偉。
葛珮帆坐輪椅上落樓梯個樣驚驚青青。
劉展灝對「自清潔處理布料」好有興趣。
當日嘉年華吸引唔少學生到場，當盧偉國研究緊張發電座椅點用時，有個小學生就向佢教路話：「咁細力唔得o架，要大力啲。」相當搞笑。理大電機工程學系教授鄭家偉解釋，其實張櫈係用喺汽車，視乎唔同路面嘅凹凸情況，產生唔同程度電力，例如普通公路上駕駛一小時，可產生約五百火電力，用作減低電動車的充電次數，或用喺普通車輛內嘅音響等用途。
EQ坐越障椅淆晒底
另一議員EQ葛珮帆就對一張可以上落樓梯嘅「必飛越障椅」好欣賞，仲坐埋上去試添！話說呢張輪椅生產嘅首二十張，已即售罄，皆因佢可以上落唔同大小、高度同材質嘅樓梯，仲好穩陣，EQ坐咗上去，並向上移動幾級之後，發明者李少麟喺佢身後用力踢咗張輪椅幾腳，佢都唔跌落嚟，但見到EQ個樣就淆晒底，強顏歡笑。
同場仲有生產力促進局主席劉展灝，雖然今次嘉年華無展出同佢生意相關嘅鐘錶新科技，但就有好多佢都未見過嘅工業產品，好似「自清潔處理布料」，對於多應酬飯局嘅人就啱晒，萬一唔小心滴咗啲紅酒、豉油落件衫度，都唔使怕，因為呢隻新物料經陽光照射四至六小時後，就會自動分解污漬，咁唔知男士們恤衫上嘅唇膏印，又能否自動分解呢？
