政壇：接手股神爛攤 無名小卒創奇迹

話說富達基金二○一三年中公布，由Dale Nicholls接替「歐洲股神」安東尼波頓（Anthony Bolton）掌管旗下中國特殊情況基金，當時市場對Nicholls幾乎一無所知，只知佢出生澳洲，嗰時四十五歲，「無名小卒」係咁畀人潑冷水。

股神引退 基金蝕19%

「無名小卒」喺一四年四月正式接手以嚟，中國股市人人自危，但佢個基金回報竟然去到百分之三十八，幾乎係同期MSCI中國指數回報嘅一個double，就算近期股災，佢今年基金回報仍然有大約百分之四，跑贏同行成條街。

睇番「歐洲股神」安東尼波頓，上世紀憑住大膽夠博嘅「反向投資」策略，喺歐洲股市稱神，二○一○年主理中國特別情況基金，點知第二年已蝕超過三分之一，大幅跑輸同期MSCI中國指數，搞到佢英名盡喪，埋單引退時，仍蝕百分之十九。

與「歐洲股神」大手大手買賣唔同，Nicholls傾向逐少逐少買兼建倉極慢，好似阿里巴巴一四年上市時，人人衝住追入，佢反而等股價跌低百分之十六時，先慢慢入貨，到阿里股價累升百分之七十五時，就大手減持。

想跟Nicholls持倉？嗱，聽講佢尤其睇好中國消費同埋互聯網股，現時揸重上海機場同埋美國納斯達克掛牌嘅網易。