政壇：高永文嘆小朋友失自由
食物及衞生局局長高永文尋日去咗一間中學做講座嘉賓，同一班中學生分享過去經歷。有學生問高永文當年讀書時，啲校規嚴唔嚴格，佢話自己讀皇仁書院時，一啲都唔嚴，仲話「It's so free」（好自由）。佢話因為自己嘅興趣係天文，所以加入天文學會，仲做埋會長添！但佢話覺得依家時代唔同咗，家長嘅學歷同要求都高咗，小朋友冇乜機會跟興趣去學嘢，形成咗好多「虎爸虎媽」，呢種發展對學生唔好。咁唔知佢又反唔反對TSA？
高永文（左）出席中學講座，與學生分享中學往事。
高永文話當年天文學會個辦公室喺學校閣樓，可以連接天台，學校好放心咁畀低辦公室鎖匙佢哋自由出入。佢仲自爆當年就算夜晚通宵觀星唔返屋企，學校都唔會理。事隔幾十年，佢話覺得依家學校嚴咗，對於依家啲學校規條多、管教嚴，家長又太注意小朋友嘅「起跑線」，佢認為呢啲情況係社會發展形成。佢話最好嘅管教方法，係學校唔需要咁多規條去管教學生們，加上老師要以身教嘅形式去教導學生，同學生一齊用唔同嘅方法去配合社會嘅發展。
