政壇：搞搞政：流會捉內鬼 傳聞滿天飛

政界內流傳三種分析，首先多個主流建制黨派，好似建仔、工聯會、經民聯都有逾半議員在席，一班建制派議員近日都大打開口牌，對部分激進泛民透過響鐘點算開會人數深感憤怒，唔少議員寧願遲至十四分鐘先現身會議廳湊夠人數。若真係不幸流會，就可以好似前日嘅情況，大條道理將責任推向激進泛民甚至主流泛民，再次強化泛民同「拉布」嘅關係，呢個分析尚算正路。

疑涉富貴黨經民聯私怨

第二個解讀係缺席嘅建制派二十人之中，以比例計，就以富貴黨缺席率最高，五個議員得一位在席，缺席率達八成。值得注意嘅係，流會前係由內務委員會主席、經民聯梁君彥擔任代主席，政壇廣為人知，富貴黨同經民聯多年嚟牙齒印甚深，有指梁君彥見其他建制黨派夠人，就冇急召其他議員歸位，寧願流會，令富貴黨成為流會元兇。但梁君彥否認傳聞，指可以出席會議嘅建制派議員都已經出席。

至於第三個解讀，就係建制派唔希望提早就《防止賄賂條例》部分條文涵蓋特首方面表態，否決或棄權嘅話，都會被泛民抹黑，擔心影響區議會選情，所以寧願流會。但有建制派指出，下個星期先辯論《防止賄賂條例》，時間上更接近選舉，對佢哋影響更大。上述三種分析，大家會相信邊種呢？冇諗到一次流會，就引來多番揣測，或者箇中原因好簡單，就係議員「闊佬懶理」。