政壇：吳得掂發威 鬧教協呃like
近排有關全港性系統評估（TSA）應否取消，掀起全城爭拗，教協喺網上發起家長教師聯署，要求消除TSA操練，教協嘅聲明批評，教育局局長「吳得掂」吳克儉提到「大部分學校、老師歡迎TSA，並且未聞校方或家長要求終止TSA。」教協認為要集教師同家長更大嘅力量，「向TSA操練說不！」吳得掂前晚竟然喺社交網站facebook（fb）一洗頹風，反擊教協，唔通隔住個螢光幕先掂、勇得起？
批對方造謠「速銷」聯署
吳得掂喺fb話，樂意聆聽各界意見，依家正檢視同優化TSA，又話自己從未講過「未聞校方或家長要求終止TSA」，佢仲反問，以造謠嘅指控「速銷」聯署，算唔算「呃like」？睇番吳得掂之前喺fb，多數都係貼吓自己去過乜嘢活動，甚至試過抽水話，海事訓練學院學員「開船」過汲水門時，一定唔會撞橋，誤寸運輸及房屋局局長張炳良。今次發出貼文，逐句反擊教協，總算擊中正確目標，睇嚟佢終於識得用fb喇！
其實，吳得掂之前出席立法會會議已遭到多名議員連環狙擊，但佢嘅回應認真唔得掂。好似教育事務委員會主席林大輝要求佢出席TSA爭議嘅公聽會，但係吳得掂就話當日佢咁啱要以私人理由離港，無法親身出席。其時已被「長毛」梁國雄寸佢，咁學生可否因私人理由唔做TSA？而另一議員陳家洛更加要求吳得掂試做TSA試卷，吳得掂當時話唔會喺壓力下做呢啲測試喎。
今次吳得掂咁勇猛，夠膽反抽擊教協，睇嚟個螢光幕幫佢擋咗唔少壓力。不過，如果吳得掂唔想停留喺「進擊的宅男」位置，喺立法會都要有啲好表現至得，咁夠膽不如親身出席公聽會啦！
