香港自詡國際金融中心，仲話係乜嘢「紐倫港」添，係咪浪得虛名，見仁見智，但有一項成就肯定勝過紐約倫敦，係乜？咪係避稅天堂囉。

香港金融財務透明度全球尾二，淪為避稅天堂。

唔係亂噏o架，倫敦稅務公正網發表最新金融保密指數報告，揭示唔同國家及地區喺金融財務方面嘅透明度，香港喺打擊逃稅或隱藏財富方面表現差劣，被評為全球「尾二」，僅好過財務透明度最低嘅瑞士，成為避稅天堂之一。

即係咁，金融保密指數排名愈高，反映財務透明度愈低，瑞士銀行業以替客戶保密聞名，成為避稅及洗錢天堂係理所當然，估唔到香港喺呢方面居然拍得住瑞士，都唔知好嬲定好笑。正如調查機構話齋，港府一直對金融財務市場採取不干預政策，亦冇積極與其他國家簽訂多邊稅務資料交換協議，財務透明度明顯偏低。

唔講唔知，直至今年四月，香港嘅基金管理業務規模達二萬一千億美元，其中超過三千五百億美元係私人銀行資產。二○一二年底，帳面上有接近一半投資內地嘅外國資金從香港流入，而呢啲資金絕大部分來自內地。表面上香港提供多元化離岸服務，包括稅務豁免、轉讓定價、金融保密等，而且允許成立唔透明嘅公司，實際上呢啲公司隨時被用作逃稅或隱藏財富。

近年國際社會雷厲打擊洗錢活動，香港冇提高財務透明度不特止，反而中門大開任由不明來歷資金自出自入，簡直係逆潮流而行。唔怪得連內地央行亦曾經點名批評香港係內地腐敗分子洗錢外逃嘅「主要中轉地區」，有人估計內地經香港洗錢嘅資金每年達到二千億港元，都咪話唔嚴重。

話時話，一直背負洗錢天堂惡名嘅瑞士，近年亦積極改革銀行業，提高透明度，去年甚至承諾自動向其他國家交出外國人帳戶嘅詳細資料，睇嚟香港都唔可以例外咯。港府聲稱香港以雙邊方式實施自動資料交換，若因此質疑落實自動交換資料嘅決心，完全唔公道喎。其實，公道自在人心，唔係靠自己吹水o架。

冇錯，香港奉行自由市場原則，資金出入不受管制，但唔代表放任自流，唔監唔管。正所謂，有則改之，無則加勉，既然香港被評為避稅天堂，港府就應該認真檢討，堵塞漏洞，否則，香港分分鐘成為全球財務透明度最低地區，到時睇怕連國際金融中心呢個招牌都可以摺埋咯，叮！