人口老化問題愈來愈嚴重,腦退化症成為大家關注的問題。患上腦退化症已經有十四年的光纖之父高錕尋日八十二歲生日,出席首次個人巡迴畫展第二站暨高錕慈善基金成立五周年活動,見佢喺太太高黃美芸陪同下精神抖擻, 不時露出笑容,而高錕嘅畫作構圖已經進步不少,認知能力大大提升。

高錕(中)在太太高黃美芸(左二)及鄺妙儀(右二)陪同下出席個人畫展。

高錕嘅「第一幅」畫作。

李美嫦(左一)選擇放假玩填顏色減壓;吳志華(右二)就享受下廚樂。

講到高錕近期的健康狀況,高黃美芸話,自從高錕跟導師鄺妙儀學繪畫之後心情變得開心,精神好咗。不過,高錕有時唔認得朋友,每次出街前都要太太反覆同佢講多幾次,好似當日畫展開幕,高太一起身就同佢講咗幾次會同佢出街,因為今日係佢生日,會同佢開一個大派對,好多朋友來同佢影相,叫佢唔使驚,夜晚就會食蛋糕慶祝。

鄺妙儀就話,藝術治療可以幫腦退化症病人掌握距離及空間感,訓練佢哋聆聽指示的能力及反應,從而建立患者自信心。不過,教腦退化症病人繪畫亦有困難,例如病患者可能會以為顏色碟上五顏六色嘅顏料係食物,將顏料放入口,所以一定要睇住佢哋,但唔會因此將顏料轉做可食用色素,反而要藉此機會訓練病患者的認知能力。

吳志華樂做煮飯公

同場仲有康文署署長李美嫦及副署長吳志華。講起藝術治療,李美嫦話都開始培養藝術興趣,早前仲喺書店買咗風靡全球的填色書《秘密花園》返屋企玩填顏色,話可以紓緩平日緊張情緒。身旁嘅吳志華就鍾意喺假日享受下廚樂,呢個星期就諗住試吓煮白酒炆腩肉,做晒一家之「煮」,太太等食就得喇。

第一手消息請下載on.cc東網iPhone/iPad/Android/Windows Phone Apps