政壇：馬化騰寬待膽生毛員工
喺香港上市嘅內地IT企業騰訊有唔少擁躉，內地網民更好鍾意佢哋旗下嘅QQ，主席馬化騰雖然係大忙人，但原來處理公司事務好認真，就連員工越級挑戰，都可以寬容處理，認真跟進，難怪被讚夠親民！
馬化騰處理員工挑戰獲得親民嘅評價。
話說騰訊有個膽生毛嘅員工，因為唔滿意公司要求喺頁面加入某種功能，就直接發咗封電郵畀馬化騰，話無可能做到。不過，佢膽粗粗之後，好快意識到自己衰多口，正想認衰仔，以免承受唔知係咩嘅懲罰，點知，馬化騰收到電郵，並冇立即炒咗佢，反而親自回覆電郵，教佢點解決問題，列舉相關方面嘅專才，同聯絡方法幫佢解決問題。馬化騰仲嚴正警告，唔可以話技術做唔到。
據講，馬化騰一向親力親為，鍾意親自回覆員工電郵，呢件事可見佢並冇因為員工挑戰而火遮眼，反而教精佢，以理服人，問你服未？
