政壇:楊紫芝被擺上枱扮懵
香港大學校務委員會主席至今未知花落誰家,但新任港大校務委員兼港大醫學院榮休教授楊紫芝就被傳係熱門人選,早幾日我哋巧遇呢位大熱,但楊教授就話連佢自己都唔知件事。
楊紫芝教授搭港鐵歸家,佢自稱睇傳媒報道先知或做港大校委會主席嘅傳聞。
當時係晚上十點半鐘,喺港島西行線列車上,楊教授喺灣仔站上車,一入車廂就有人讓座畀佢,手持一紮黃色花嘅楊教授輕鬆坐下。呢輪港大校委會嘅爛攤子搞到唔少人頭都大埋,楊教授係咪好似傳聞咁接過呢個重任呢?佢話:「係咩?有啲咁嘅事咩?我都唔知呀,我都係睇傳媒報道先知咋!」
當事人守口如瓶都冇符,講起先知,呢晚佢啱啱去完朋友嘅生日派對,正準備返屋企,其後列車抵達中環站,楊教授就落車,臨別仲送上一句友善嘅拜拜添。