政壇：越洋疲於奔命 「鋒」狂唱衰香港
「唱衰香港」接班人、學民思潮召集人黃之鋒近月不停飛外國噴口水，繼九月去完美國出席會議後，十月又去咗英國六間著名學府，期間仲獲邀演講，「空中飛人」生涯似乎好過癮。前晚，黃之鋒又喺社交網站打卡，話準備上機前往荷蘭分享「自決香港未來」，即是宣揚「港獨」，佢自稱呢種「公幹」令人十分疲累及非常瘋狂，呢啲驟看似訴苦嘅話，嗒真啲更似係玩轉地球而晒命，淨係睇佢愈瘋狂愈投入就知喇。
佔領行動之後，一眾佔領人士就多次出國講香港嘅政制同民主狀況，大講雨傘運動，當中以黃之鋒出外路演最為頻密。今年九月，他先同外號「李漢奸」嘅民主黨創黨主席李柱銘及佔領中環發起人戴耀廷去美國華盛頓「唱衰香港」，一個月後又去咗英國，適逢國家主席習近平到當地訪問，一度畀人以為佢有意狙擊國家領導人。
今次黃之鋒係去荷蘭兩日，跟住要返港準備學民會議和學校中期測驗，不過，佢就大呻「坐二十四小時飛機逗留四十八小時的旅程，真的非常瘋狂」。說話係咁講，但睇佢不停更新社交網站嘅個人情況，就可見樂在其中兼樂此不疲啦。講到尾，世界真細小，但係口水就有好多。
另外，學聯秘書長羅冠聰上周六亦去咗韓國首爾，出席「世界民主主義運動」大會，分享佔領行動心得，仲代表佔領行動參加者獲頒「民主化運動貢獻獎」。
