早排星光大道擴建計劃引起軒然大波，尋日，立法會大會上議員繼續質疑包括星光大道嘅尖沙咀海濱活化計劃，泛民主派議員炮聲不絕，焦點就係批評呢個計劃係官商勾結，民主黨（白鴿黨）嘅何俊仁（AV仁）更狠批當局閉門造車，民政事務局局長劉江華當然一一否認，但佢都趁機還擊，將身兼油尖旺區議員嘅涂謹申「擺上枱」，暗窒涂應該知道當區發展，但白鴿黨卻對呢個計劃乜都唔知，一拳中晒，果然係拳手出絕招，出拳多不如一拳中！

AV仁喺會上狠批呢個計劃，又指劉江華將尖沙咀海濱活化計劃閉門造車，委託信任人士負責項目係私相授受嘅表現。仲話民政事務局向外表示，呢個項目不涉公帑，又用種種理由解釋唔需要招標等，都係砌詞，AV仁話，呢個項目廣受歡迎，有唔少人願意付出同樣條件參與海濱計劃，認為項目應該由公眾參與其中。

涂謹申躺着也中槍

劉江華就反駁指，海濱活化計劃係由油尖旺區議會提出，佢仲點名同屬白鴿黨的AV仁黨友涂謹申係油尖旺區議員之一，應該清楚計劃背景，仲叫AV仁上網翻查區議會記錄。呢記還擊好漂亮，搞到AV仁嘅氣勢窒一窒，更搞笑嘅係，大家會質疑涂謹申究竟有冇出席區議會？或有冇向黨友匯報當區發展嘅最新情況？阿涂躺着中槍，真係要多得AV仁！

講開又講，劉江華同涂謹申喺立法會共事多年，曾經輪流出任保安事務委員會正副主席，以往喺議會上亦多次就保安事務爭鋒相對場面，上屆又齊齊競逐超級區議會議席，早有「牙齒印」。今次劉江華報仇幾年未晚，阿涂想唔中伏都難喇！

第一手消息請下載on.cc東網iPhone/iPad/Android/Windows Phone Apps