好多人經常用龜兔賽跑嚟比喻內地同香港，唔係冇理由㗎。好似港珠澳大橋咁吖，內地工程順順利利，可以如期完成，而香港就一波三折，搞到通車無期，簡直相形見絀。

講起就丟架，港珠澳大橋動工以來，延誤及超支醜聞從未停止過，先有司法覆核及致命工業意外，依家又有口岸人工島移位問題，唔止造價不斷飆升，原定一六年通車嘅目標更加化為泡影。港珠澳大橋係國家級工程項目，萬一通車無期，隨時成為國家級笑話，香港想唔臭名遠揚都幾難。

反觀內地大橋工程順利得多，珠海表明如期明年竣工。澳門早前傳出進度滯後，本報記者實地採訪了解，發現成因係口岸人工島填海需要等待沉降，屬預期之中，估計唔會影響工程進度；至於新城A區進度滯後，亦已擬訂後備方案，即搭建臨時棧橋，連接珠澳口岸人工島及澳門半島，應可避免無法如期通車嘅問題。簡單啲講，港珠澳大橋內地及澳門段準備就緒，萬一香港跟唔上，咁就變成佗衰家咯。

講到呢度，太一叮諗起宋代陸游嘅《詠梅》詞：「驛外斷橋邊，寂寞開無主；已是黃昏獨自愁，更著風和雨。」港珠澳大橋被香港搞到幾乎淪為「斷橋」，咪就係不斷沉淪嘅縮影囉。香港競爭力每況愈下，邊緣化危機日甚一日，本來港珠澳大橋可以加強三地合作，成為推動香港經濟發展嘅新動力，可惜香港唔爭氣，拖拖拉拉，蹉跎歲月，想唔獨自愁都幾難。一條港珠澳大橋，加上廣深港高速鐵路，跨境基建一波三折，香港自甘墮落唔緊要，最慘係累人累物吖。

唔係嚇你㗎，港珠澳大橋肩負三地客流及物流運輸重任，延誤通車勢必影響本港特別係大嶼山嘅發展。香港物流業逐漸式微，貨櫃吞吐量由全球第一跌到第五，依家大橋工程仲喺度拉牛上樹，等到建成通車，睇怕已經係明日黃花咯。難怪有人話，將來嘅大橋唔可以成為振興經濟嘅大動脈，隨時淪為拖垮財政嘅大白象，真係一啲都冇誇張。

講嚟講去，都係港府無能之過。正如工程界人士話齋，港珠澳大橋人工島出現廣泛移位屬不尋常現象，極有可能同前期勘探工作甩漏有關，當局難辭其咎。正所謂，無可奈何花落去，香港基建以前喺國際上享有盛名，家陣變成烏龍百出嘅代名詞，香港路路不通，想唔變斷橋都唔得喇，叮！