城中鏡：獲頒傑出工業家 91歲林亮滿場飛

香港工業總會頒發本年度「傑出工業家獎」，有「中國變形金剛之父」稱號嘅永和實業主席林亮獲獎，今年已九十一歲嘅林亮親身到場，充滿活力嘅佢一亮相，就四圍同老友合照，顯得好開心。

林亮獲工總頒發「傑出工業家獎」，佢話會繼續支持投身工業嘅年輕人。

支持年輕人投身工業

佢話，近兩年旗下經典黃色小膠鴨重出江湖，係為咗帶啲正能量畀大家，又指做工業嘅人特別有拚搏精神，所以只要佢一日仲有力，都會繼續支持投身工業嘅年輕人。

憶起往日打工經歷，佢話自己任勞任怨，從未與老細計較加班及人工問題，但係到咗佢做老細時，就好明白打工仔嘅心理，有次過年前，唔夠錢出糧畀員工，都堅持向朋友借，等班員工可以有錢過個開心年。