政壇：搞搞政：建制進退失據 民望輸九條街
政黨嘅生命力，同選票、民望密不可分，一個針對市民對政黨支持度嘅調查顯示，政改之後，建制各黨派嘅民望齊齊插水，當中以建制大黨民建聯評分跌幅最大，新民黨亦跌至二○一一年二月首次上榜以嚟嘅新低，其他如工聯會亦一樣插水，甫坐上建仔主席位，李慧琼即一嘗坐過山車嘅滋味，唔知會唔會嗌得大聲過新民黨主席葉劉淑儀呢？
建仔41.8分包尾
港大民意研究計劃喺上個月十九至二十三日訪問咗約一千名市民，發現建制派政團嘅民望，幾乎全線下跌，建仔嘅評分跌幅最大，若同對上一次調查、即今年四月底至五月初進行嘅同類調查相比，大幅下跌咗七點二分至四十一點八分。工聯會就由四十八點二分下跌五點二分至四十三分，唔知係咪同之前該黨立法會議員陳婉嫻協助十二歲無證男童懷仔事件有關。而喺過去幾次同類調查中「失蹤」、今次先至重新上榜嘅新民黨，評分就下跌至二○一一年二月以嚟嘅新低，僅得三十八點五分。
今年六月政改方案喺立法會表決時，建制派因為要「等埋發叔」而離開會議廳，最終甩轆，政改方案戲劇性失敗收場。其後到七月份，白鴿黨踢爆啟晴邨公屋住戶食水含鉛超標，跟住大搞鉛水事件，建制派進退失據，輸足九條街，依家喺民望評分中體現晒，再唔諗計應變，小心跌落深淵呀。
