立法會一個小組委員會尋日討論立法會地方選區嘅分界同議席分配，公民黨立法會議員「袋巾傑」梁家傑發言時，要求當局提供文件，解釋選舉管理委員會點樣喺六個分配議席嘅方案中，揀一個出嚟。政制及內地事務局副局長陳岳鵬就話，選管會嘅報告已經列晒出嚟，而且報告亦已派發畀議員，發緊夢兼冇做功課嘅袋巾傑，呢吓知道衰咗，即刻以笑遮醜。

袋巾傑喺會上指，選管會採用咗一個分為兩個步驟嘅方法，喺五個建議地方選區分配三十五個議席。佢要求當局提供資料，解釋點樣喺原先六個方案中，揀現時採用嘅出嚟，又話如果有一張紙可以將六個方案列晒出嚟，就一目了然。點知結果係自己冇做功課，袋巾傑即刻以笑遮醜，話份報告放咗喺辦公室，無帶落嚟，認低威話佢自己睇番。小組委員會主席譚耀宗都忍唔住加多句，指如果佢冇嘅話，秘書處可以再提供畀佢喎！

第一手消息請下載on.cc東網iPhone/iPad/Android/Windows Phone Apps