政壇：網龍夢幻總部 返工鬥好玩
美國矽谷嘅IT企業為咗刺激員工嘅創意，將公司整到遊樂場咁，大家都聽過，但估唔到內地兼營教育業務嘅手遊網龍一樣咁有創意，淨係佢哋耗資一億六千萬美元打造福州嘅企業總部，並向CBS（美國哥倫比亞廣播公司）買埋版權，建咗個好似經典劇《星空奇遇記（Star Trek）》入面架太空船「企業號」（Enterprise）嘅總部已經夠出位，而且，公司推行玩嘅哲學，同事返工好似返學咁，連懲處都有型過人。
梁念堅（左）與 任國熙（右）
網龍福州總部好夢幻，似足《星空奇遇記》架太空船。（互聯網圖片）
該公司董事梁念堅（Simon）話，總部係用「校園」同埋「運動」做主題，員工之間會以「同學」相稱，「同學」遲到或者做錯嘢，冇人鬧嘅，但有罰喎，例如要個「同學」上10米高台跳吓水，因為架太空船總部有泳池同埋高台跳水。連公司高層、CFO任國熙都跳過7米台(O架)！
阿Ben做錯乜？冇，事關佢唔係畀人罰，而係純粹試玩。阿Ben話好鍾意公司咁playful，仲話懲罰除咗跳水之外，亦有罰跑3km同10km！好民主，犯錯者可以自選體罰項目，當然，有教練督促住「同學」跑喇……咁好玩，同間公司員工好年輕有關，一度平均年齡只有26歲，依家就變咗28歲喇。
