政壇：醫委會選戰 群雄火併
負責監督全港註冊醫生嘅香港醫務委員會將起風雲，因為有兩名委員嘅三年任期，將於明年一月屆滿，十二月將有一場選戰。即將任滿嘅，係威爾斯親王醫院婦產科部門主管張德康，以及醫學會副會長陳以誠，兩個席位隨即引來好多有心人競逐，當中三個都有公共醫療嘅背景，包括欲尋求連任嘅張德康，公共醫療醫生協會會長陳沛然同公共醫療醫生協會前會長佘達明。
五人競逐兩位
其他有意競逐嘅，仲有陳以誠同西醫工會會長楊超發二人，形成五爭二嘅局面。據了解，今次醫委會委員改選咁熱鬧，同醫委會角色愈來愈重要有關，因此吸引醫生工會現任或前任會長，甚至醫學會核心人士競逐。不過，咁多個參選人中，又以近期於公立醫院醫生額外加薪百分之三一役中，搶盡風頭嘅陳沛然備受矚目，唔知佢會唔會藉公院額外加薪一役再下一城，殺入醫委會。
有政界中人分析指，張德康同陳以誠要成功連任，一啲都唔容易，單係講陳沛然，佢喺今次公立醫院醫生加薪風波之中，唔單止發動咗近十年來最大規模嘅靜坐，有逾千人響應參與，仲獲得主管至前線初級醫生、專科學院院長、兩大醫學院院長同教授老中青三代支持，甚至連病人組織都加入「撐腰」，而最重要嘅，係發揮到醫學界團結嘅力量，實力真係不容忽視。不過，今次任滿嘅席位，一個來自公共醫療界，一個來自私營醫療界別，唔知選舉結果會唔會延續兩個派系，但係選戰精彩已經可期。
「五揀二」戰況咁激烈，局中人會唔會籮籮攣呢？張德康笑笑口話，一切交畀選民決定，選唔到咪返屋企休息，平常心兼睇得開嘅心態，果然一笑已經風雲過。
