俗語有話「人嚇人嚇死人，鬼嚇鬼嚇死鬼」，一啲都唔誇張o架，有時遇上突如其來嘅驚嚇，莫講話病人吖，好人好姐心血少啲都嚇死！

係咁嘅，瑪麗醫院今年一月引入新嘅血液分析儀器，懷疑軟件出問題，一直誤將「三酸甘油脂」數值當成「甲狀腺球蛋白」數值。最大劑嘅係，呢個數值係判定甲狀腺癌病人有無復發嘅指標，作為癌症康復者，最怕聽到「復發」兩個字，搞錯數值同誤判死刑無分別，無病都嚇到有病啦。

係人都知，醫學化驗出錯嘅後果可大可小，隨時令醫生作出錯誤判斷，輕則搞到病人治療受延誤，重則導致病人死亡，人命關天嘅醫療儀器居然出錯，受害嘅咪又係病人！

嗱，院方翻查紀錄發現有十名病人受影響，部分人要接受有放射性成分碘核子掃描，話就話劑量唔會危害健康啫，正所謂唔怕一萬最怕萬一吖嘛，放射性碘攝取量過高，有可能增加患血癌或其他腫瘤嘅風險o架，分分鐘無癌變有癌，你話幾無辜呢！

問題係，呢部儀器用咗足足十個月，點解一直無人發現有問題呢？連腫瘤科專家都抓晒頭，「甲狀腺球蛋白」同「三酸甘油脂」係兩種截然不同嘅檢查，冇理由會搞錯，懷疑化驗「甲狀腺球蛋白」嘅數值通常簡寫TG，而咁啱得咁蹺，「三酸甘油脂」嘅英文名稱亦有T及G，馮京當馬涼咁話喎。

唔係啩，照計醫生係精英中嘅精英，點解會懵到上心口？講到底，擺明係儀器軟件以至檢查數據一條龍出錯就真！如果連咁簡單嘅英文字母都搞錯，唔止要重返醫學院進修，直頭要惡補英文呀。

鬼咩，公立醫院衰開有條路。呢嗱，屯門醫院病理部早前因人為疏忽，錯誤輸入肝酵素分析儀嘅參考值，好多病人受害，當時已經有議員要求醫管局全面檢視其他公院嘅儀器，避免同類事件發生。

弊在醫管局講一套做一套，每次都話會吸取教訓，每次都係大隻講，真係睬你都有味啦。今次都唔例外，院方例牌向醫管局呈報事件，要求儀器供應商跟進及提交報告，結果係點？大家有眼見喇。

有人問，公立醫院病入膏肓，醫療事故層出不窮，無奇不有，到底可以點醫呢？計太一叮話齋，唔使勞煩專家交報告，小學生都識斷症，就係醫管局管理混亂，呢個病灶不除，仲死得人多呀，叮！