名媛寇鴻萍嘅女兒Lydia唐貝詩同妹妹Fiona唐貝欣尋日齊出席活動，問到Fiona會唔會同家姐Lydia簽同一娛樂公司？佢話暫時唔會，亦話冇考慮擔任幕前工作，佢話：「依家主要幫媽咪做護膚品生意、餐廳marketing文職工作。」

唐貝詩（右）話暫時唔會建立自家品牌，左為妹妹唐貝欣。

喺旁邊嘅Lydia就話自己對表演同創作方面有濃厚興趣，亦介紹手上有份設計嘅手袋系列，問到會唔會建立自家品牌？佢話：「唔會住，依家公司畀我o既工作檔期好滿，除o左出席活動，仲要上訓練班學演戲同唱歌。」佢話接咗五個演唱會，早前已首次喺馬來西亞登台。

見Lydia鎖骨同手腕位置化有萬聖節嘅疤痕裝飾，問到之前係咪參加咗萬聖節派對？佢話：「尋晚冇出去呀，但都想化吓妝影張相應節。冇特別戒夜生活，第一年（萬聖節）冇出去，o係蘭桂坊完o左party好難截的士，貴o左之餘又未必上到。」

第一手消息請下載on.cc東網iPhone/iPad/Android/Windows Phone Apps