城中鏡：商思遊日韓
喺呢個艱難嘅時勢，唔單止政界，就連商界都要「腦震盪」。中華廠商聯合會（廠商會）一班會董會成員同秘書處高層早前舉行海上集思之旅，一行七十幾人浩浩蕩蕩坐郵輪遊日韓。沿途除咗睇「楓」景、食靚嘢之外，仲就廠商會嘅未來發展集思廣益，認真有諗頭。
李秀恒（前排左六）帶隊舉行海上集思會，廠商會中人齊齊腦震盪。 （受訪者提供）
嚴玉麟夫婦（左一及二）同鄭錦鐘夫婦（右一及二）等好友結伴同遊日韓。
楊志雄（左）同史立德夫婦（中及右）齊歎成吋厚嘅神戶牛柳。
有份參加今次活動嘅包括廠商會會長Eddy李秀恒、副會長徐炳光、Johnny楊志雄同史立德，仲有仁濟醫院副主席嚴徐玉珊同老公嚴玉麟、保良局前主席鄭錦鐘夫婦等人。佢哋一行人先由香港飛赴日本大阪，然後喺神戶登上郵輪，沿途經過日本高知、日本秋田、清水富士山及韓國釜山等地，玩足十日。
吳國安難忘秋田紅葉
Johnny話一場嚟到神戶，梗係要試吓正宗神戶牛肉，佢最難忘係歎成吋咁厚嘅A5神戶牛柳。會董吳國安對秋田嘅遍地紅葉好着迷，佢話大家到咗韓國時，Eddy仲請全體團員勁擦亞拉斯加長腳蟹，個個食得好盡興。嚴玉麟話同一班好友共度悠長假期已經好開心。
坐郵輪夠晒滋油，但時間流流長，所以佢哋亦安排唔少船上活動。發起今次活動嘅Eddy話，今次係廠商會有史以來最大型嘅集思會，仲要係喺郵輪上舉行，眾人經過多日嘅輕鬆相處，既加深彼此了解，亦為未來會務發展出謀獻策，收穫好大喎。
