政壇：余振球賣Bra南北唔一樣
北方定南方嘅女性背脊厚啲？內衣股都市麗人首席財務官Phillp余振球話你知，係北方。Philip唔係靠估，佢哋公司設立咗個「中國女士體形數據庫」，由於北方同南方女士體形唔一樣，所以北方市面上嘅Bra同南方係唔一樣(o架)。
林志玲早前喺東莞出席內衣Show。
余振球
查實女士買Bra，花巧嘢都係次要，唔啱身就乜都假。依家乜嘢都可以網購，上網買Bra亦好普及，雖然方便，但冇得試着，好易買錯唔啱身。Philip話顧客上網買內衣發現唔啱身，一般唔會覺得係自己身材有問題，而係認為品牌設計有問題。佢哋公司為求造出「絕世好Bra」，所以就設立咗個體形數據庫，公司設計師甚至會親力親為上前線賣Bra，務求搵多啲機會直接同消費者溝通。
雖然網上賣Bra有一定難度，但Philip仍然睇好網購。佢話網購消費者對價格敏感，公司大部分貨品價位大眾化，佢哋最好賣嘅Bra款亦只介乎七十至一百二十蚊人仔。佢估計，今年雙十一，佢哋喺阿里巴巴平台單日銷售額可以去到八位數（即千萬計），預期全年公司賣Bra可賣到一億個。
好似美國Victoria's Secret咁吸睛嘅超模內衣Show？佢哋一樣有，早前就喺東莞搞咗個。佢哋亦趁內地迪士尼概念大熱「跟機」推迪士尼內衣。咦，好想睇佢哋位代言女神林志玲着迪士尼內衣添，唔知有冇米奇Bra呢？
