政壇：煲劇喻經濟 財爺搞gag
財爺「鬍鬚曾」曾俊華尋日連出四個活動。佢朝早首先去咗一個會計師研討會，中午就出席財經論壇午餐會，傍晚去會展一連出席社企民間高峰會同一個親中團體成立典禮。鬍鬚曾到場通常都會發言，講嘅嘢都不外乎嗰三幅被，但喺午餐會，佢就多次用比喻搞gag，唔知係咪怕台下食晏食到悶呢？
曾俊華形容美國加息好似一套等完又等嘅連續劇，早知結局，但未知上演日期。
鬍鬚曾話自己雖然大學讀建築，但喺研究院及擔任公職三十幾年，接觸最多嘅反而係經濟。經濟學有一個非常有趣嘅地方，就係呢個係唯一一個學科，可以由提出完全相反理論嘅學者同時贏得諾貝爾經濟學獎，就係二○一三年三名得主，對市場上資本價格合理性有南轅北轍嘅解讀，而兩位經濟學者隨時有三種唔同意見，仲話經濟學家所用水晶球嘅型號，全部都唔同。
而各國關注美國加息，鬍鬚曾就形容好似係一套等完又等嘅連續劇，一早知道結局，但係未知道上演日期。佢早前訪美，紐約聯儲銀行總裁杜德利都話，呢次好可能係歷史上講得最長、最多嘅一次加息。
