政壇：筍工王公司有幾黑？
有間公司連續多年畀美國財經雜誌選為No.1僱主，嗰度打工真係咁筍？睇埋佢哋啲員工爆料先講。最好帶埋電筒，事關都幾黑暗吓。
呢間公司入面人才過多，結果連測試網站某粒掣係咩色啲小學雞嘢，都係精英做，英雄無用武之地，冇得發揮。成間公司都係人才。仲有呢班精英個個背景差唔多，來來去去都係出自嗰幾間大學，睇嘢一樣，興趣一樣，幾乎倒模咁。又有軟件工程師話，嗰度做幾年，好容易會離地，同Open Source（開放原始碼）嘅真實世界脫節。
喺嗰度做，似喺間Startup（初創公司）做，可惜係間大到無比嘅Startup，即是？即是一方面產品發布周期龜速，但另一方面手頭項目會突然無端叫停，無上訴之餘，跟過叫停項目嘅人，日後亦唔使諗升職。
想上位，要睇成績，講個程式「可用性」幾高、幾咁冇Bugs（程式錯誤）？咪傻，所有量化唔到、度唔到嘅嘢，公司眼尾都唔睇。做技術嘢嘅還好，若係銷售、招聘呢啲Non-Tech工種，只會覺得自己係粒螺絲；真心相信一粒螺絲幾咁重要？恭喜你囉。
仲有，嗰度升得做管理層，未必因為識管理，可能只係好叻嘅技術人，唔知升佢哋去邊好，結果出現咗班完全唔掂嘅管理層。
睇到呢度，你估到係邊間公司未？
