政壇：搞搞政：會否選特首反覆 曾鈺成唔嫁又嫁
話說立法會主席曾鈺成喺一二年特首選舉期間曾表示有意參選，惟事隔十日即「轉軚」宣布唔參選，當時佢嘅解釋係自己「三無」，即無人脈、無班底、無勇氣，但心水清嘅人都知道佢不獲祝福。其後面對傳媒多次追問會否參選一七年特首選舉，佢就講到明唔會選。但尋日佢出席一個論壇時，再次被問到會唔會參選特首，佢先係話以前講過嘅唔算，叫大家抹咗去，令人聯想佢有意捲土重來。點知轉個頭又話當然唔選，話自己無參選條件喎！佢態度咁曖昧不清、反覆無常，究竟想點？
其實佢喺今年四月接受訪問時就話，自己同宣布參選美國總統嘅希拉妮一樣，二人都係六十七歲，但特區行政長官需要較年輕嘅人擔任，又話自己有自知之明，無可能做得好特首呢份工。後來佢被揭辦公室遭竊聽，以及喺佔領期間發表涉及種族歧視嘅言論，接二連三出現疑似針對佢嘅黑材料，佢就趁機再次表明無意參選立會同特首選舉，卸任立會後亦唔會出任港區全國人大或全國政協委員，只係想專心籌組智庫。
屢次高調批評政府
但後來佢嘅胞弟民政事務局前局長曾德成突然被辭職，佢多次高調批評政府，令人懷疑佢背後可能另有打算。佢尋日喺論壇上，被重提過往對參選特首態度曖昧，包括講過「never say never（永不說不）」及唔會參選。佢話以前講過嘅唔算，又話新民黨主席葉劉淑儀啟發咗佢做政策研究好重要，原因係市民對特首嘅政綱有期望，所以認真研究政策係有意義嘅。咦？咁講即係想選？但係現場有人追問佢係咪有意參選特首時，佢又轉口風話當然唔選，真係唔知邊句先真。
曾鈺成早前喺報章撰文，曾提到外國新舊政府交替時會出現「跛腳鴨」情況。佢尋日話香港政府唯一一次變跛腳鴨，就係特首梁振英同前任特首曾蔭權交替時，當時梁振英三月當選，七月上任，並力推零雙非政策，但時任食物及衞生局局長周一嶽就乜都做唔到，令政府成為跛腳鴨。
