政壇：陳維安呻官場苦辣
點解官場被形容為「熱廚房」？相信做過教育局副局長嘅立法會秘書長Kenneth陳維安應該好清楚箇中原因，亦有好深嘅體會先啱。早前佢出席一個活動時，聽到律師會前會長Lester黃嘉純話自己咁大個人，仲未經歷過苦同辣，Kenneth聞言即刻話：「梗係啦！你都未做過政府！」Kenneth咁大反應，仲用咁強烈嘅味道形容為官生涯，唔通佢當時面對嘅壓力好大？
兒子讀國際學校被轟
人生流流長，每個人總會經歷甜酸苦辣嘅滋味。Kenneth細數佢嘅前半生時話，讀小學時功課少，老師及同學都好好，所以成個童年嘅回憶係甜嘅多。佢一直讀男校，到大學時先開始拍拖，嗰陣就嘗過酸嘅滋味，後來加入政府就「又苦又辣」喎！
睇番Kenneth由○八年至一二年短暫嘅官場生涯，確係經歷唔少風波。包括○九年人類豬流感肆虐時，教育局要求全港幼稚園及小學停課，惟Kenneth太太竟建議佢囝囝就讀嘅學校舉行私人畢業禮，遭其他家長炮轟。
翌年，Kenneth多次被質疑其兩名兒子就讀國際學校，係咪代表佢唔認同本土教育。當時身為教育局高官嘅Kenneth，確係幾尷尬嘅。
講番Kenneth同Lester，原來佢哋由細識到大，佢哋一個讀拔萃，一個讀喇沙，兩間學校「由細打到大」喎！Lester話學校打交就唔會攞「架生」，但以前喺又一村附近有個掘頭路位，就成日有人攞晒「架生」打交，佢細個都要避開咁話。
