系統評估惹爭議 教局跪低自取辱
無風又起浪，已經實行超過十年嘅全港性系統評估（TSA）最近引起爭議，搞到滿城風雨。面對唔少家長要求取消嘅呼聲，教育局開頭仲死撐，直到尋日至死死氣跪低，承諾會進行檢討喎，你話係咪唔衰攞嚟衰吖。
教育局局長吳克儉係咁講嘅，當局將會成立委員會檢討全港性系統評估，三個月內提交建議；佢仲重申系統評估唔會匯報學生個人成績，亦唔會用作小六升中派位、學校排名或殺校嘅指標咁話。好明顯，港產官僚進退失據，大失方寸，系統評估隨時又係跪低收場，成為施政無能嘅另一個見證。吳克儉做一樣衰一樣，唔怪得畀人叫「吳得掂」喇。
即係咁，作為評估學生基本能力嘅機制，全港性系統評估本來係無可厚非嘅，好多國家都有相關嘅機制，一直相安無事，香港之所以引起咁大嘅爭議，好明顯係當中出咗問題。當局話就話評估成績只係作為優化教學參考之用，唔會增加學校及學生嘅負擔，可惜事實啱啱相反，喺教育局嘅無形壓力之下，學校互相攀比，為咗爭取更好嘅評估成績，經常瘋狂操練學生，搞到壓力大增，怨聲載道。
正如教育界人士話齋，因為操練系統評估而增加學校和學生壓力，唔止打擊學生學習興趣，更會影響學校原有教學目標及課外活動，甚至剝削學生閱讀時間，根本係得不償失。可以見到，部分私立學校相繼退出系統評估，證明呢個制度唔受歡迎，當局仲喺度扮鴕鳥，強調唔會取消評估，簡直係自欺欺人。
所以話，系統評估搞成咁，「怪獸學校」固然有責任，而「怪獸政府」更加責無旁貸。教育局唔係唔知評估機制甩晒轆，亦唔係唔知學校過度操練學生，只不過當睇唔到，一直闊佬懶理，任由學生淪為白老鼠，分明係靠害。
講到底，好地地嘅系統評估之所以淪為人見人憎嘅怪物，完全係教育政策混亂嘅結果。港產官僚好大喜功，教育改革不斷，可惜志大才疏，五時花六時變，搞到學校及家長無所適從，唔止係誤人子弟，直頭係禍港殃民。難為前朝政府仲話要發展教育產業添，簡直貽笑大方。
計太一叮話齋，既然港產官僚咁鍾意評估，不如進行一次「高官全港性系統評估」，合格嘅留低，唔合格嘅叮走，咁仲實際喇，係咪！
