政壇：唐偉章踩車 志在有偈傾
理工大學校長唐偉章尋日出席一個嘉年華活動時，見到一架單車發電機，即刻忍唔住坐上去試玩，斷估佢實好熱愛單車喇！唐偉章直認鍾意踩單車，不過佢無「戰車」，次次都係租車，而且踩單車嘅時候，最享受嘅唔係做咗運動去出身汗，而係同車友傾偈喎！
唐偉章尋日出席一個嘉年華活動時，輕鬆試玩單車發電機。
大多數人都視踩單車為運動，但唐偉章就當係聯誼活動，因為佢每次都一行十人浩浩蕩蕩出發，試過同朋友、同事，甚至學生一齊踩單車。
唐偉章話，過程中最開心嘅，係大家中途停低傾偈，所以如果冇人同佢一齊踩，佢就寧願去健身室玩單車。
近排幾間大學輪流發生學生衝擊校董會或者校委會嘅事件，搞到一眾大學校長疲於奔命急「拆彈」。
難得唐偉章仲咁風騷玩單車，莫非佢好運過人？
