香港女童軍總會日前舉行周年晚宴，該會副會長王賜豪同出席晚宴嘅警務處處長「一哥」盧偉聰好老友，原來兩人係中學兼大學同學。王賜豪大爆盧偉聰讀書時，已經立志做警察，估唔到最後真係入呢行，仲做埋一哥添！
王賜豪話，當年有位生物科老師上堂時稱，根據過往嘅經驗，佢哋一班同學裏，十個有三個可做到醫生，點知盧偉聰就話唔做醫生，要做警察，令佢覺得好驚訝！講起制服團體，盧偉聰話當年佢參加過幼童軍嘅前身小狼隊，但係中學及大學階段，就冇再參加類似嘅制服團體，因為要專心讀書。
