泛民議員力撐港大學生會會長馮敬恩口頭洩密,但又批評偷錄港大校委發言事件唔道德,被轟持雙重標準。全國政協常委「唐唐」唐英年尋日出席電台節目時,怒斥今次偷錄校委行為「卑鄙」,「係卑劣過盜竊嘅行為」。不過,當佢被問及曾在二○一二年特首選舉中,大爆行政會議嘅機密內容時,他則推說「偷錄同披露保密文件言論,係完全兩回事」,並聲稱自己已為洩密承擔責任。唔通佢已經被佔中發起人戴耀廷嘅「犯法後自首就符合法治論」感染,認為只要肯承擔責任,就公然洩密都冇問題?

唐英年當年喺選舉論壇大爆行會機密。(資料圖片)

當年民望大落後嘅唐英年喺電視直播選舉論壇中,聲稱對手梁振英(CY)曾在行會會議上提到香港遲早出動防暴隊同催淚彈對待示威者。CY否認,唐英年即指着對方稱「你呃人!」成為經典。

唐英年昨早話,保密制有助與會者暢所欲言,但當年佢評估過後,認為事件涉及嘅公眾利益凌駕行會保密制,因此公然洩密。被問及馮敬恩大爆校委會會議內容,牽涉嘅公眾利益,係咪大過當年佢大爆行會機密,佢就話:「我唔識得評估囉。」

第一手消息請下載on.cc東網iPhone/iPad/Android/Windows Phone Apps