政壇：連環火燒象牙塔 大學校長好頻撲
多間大專院校近期遴選領導層都面臨衝擊，由香港大學任命副校長、浸會大學遴選校長以至嶺南大學委任校董，都爭議多多。最近連港大委任校委同中文大學委任校董，都有好多學生同校友質疑被委任人士係咪親政府，即係支持特首梁振英嘅人士，郁吓就話院校自主遭干預。一眾高級行政人才現時動輒得咎，象牙塔之火更燒到負責大學管治嘅校長，睇吓呢輪港大嘅馬斐森、中大嘅沈祖堯同浸大嘅錢大康成日忙撲火，便可知一二。
浸大生衝擊 毀鎖壞門
港大校委會主席同中大校董會主席都夠鐘換人，但政府遲遲公布唔到，一大可能係因為近日社會對政府委任人選有意見。其中港大學生會甚至用過衝擊手法，阻止校委會討論副校長人選，依家就將矛頭指向盛傳接任港大校委會主席嘅李國章或中大校董會主席梁乃鵬，話佢哋係親政府。今年五月先爆出遴選校長被大學生率隊衝擊嘅浸會大學，有校董就透露，當時學生衝入去會議室，將門鎖打爛，又整爛防火門，目的係阻止校董離開，衝擊情節比港大更嚴重，呢啲行為早已構成刑事毀壞，只係校方決定唔追究，事後睇番，可能真係太仁慈。
聽講當日有遴選委員離開時，被指罵「尸位素餐」，呢啲委員既冇收錢，又開咗好多會去審議，佢哋反而質疑班學生知唔知乜嘢叫尸位素餐？呢位校董慨嘆，愈嚟愈多獲委任大學校董嘅人，畀人扣帽子話係親政府，搞到人心淡。
