政壇：Greg蘇數白欖 廢話連篇
本港旅遊業大勢不妙，入境訪港人次連跌數月，寒風陣陣之下，日前再爆出一單內地旅行團旅客在購物點打鬥中死亡嘅事件，一時之間，內地出現咗好多「遊香港、小心被打死」嘅負面說法，本地旅遊及消費業人士都希望當局盡快出招作補救，點知當局遲遲冇應變，商務及經濟發展局局長（Greg蘇）蘇錦樑尋日出席活動時，佢只係將舊料攞嚟數白欖，衙門只係掛住講廢話，難怪業界人士都激到紮紮跳。
內地客被打死 雪上加霜
其實呢宗內地旅客在港死亡事件，涉及超低價團費同業界運作混帳，背景複雜，但內地民間及網絡上，卻以偏概全，趁機踩多腳，好多「遊香港、小心被打死」、「不花錢就死」嘅貼文傳完又傳，香港業界人士愈睇愈擔心，最驚內地旅客信以為真，咁樣先係元旦同新春訪港旅遊市道受影響，長遠更可能影響其他未訪港嘅內地居民對香港嘅印象。
希望港府重視，事關喺呢個時候，香港如果仍然遵循原有嘅做法，寄望於執法機構調查之後，就會還原結果同埋事實，到時必定一天光晒就好弊，因為挽救旅業形象嘅最佳時機已經過去。
Greg蘇尋日出席活動，大家追問有冇打救旅業嘅措施，佢話，當局會加強打擊違規強迫購物嘅活動，又數埋一堆「單車賽」、「網球賽」甚至「高爾夫球賽」嘅盛事嚟充數，呢啲活動大都過咗去，當局依家最應該係撲火、撥亂反正喎。
業界人士就話，商務局係咪應該統領主管旅遊嘅部門，針對「打死人」事件嘅負面消息，及時澄清同消毒呢？
依家係互聯網嘅時代，如果唔喺人哋仲關心事件嘅時候，及時作宣傳，好快就蘇州過後冇艇搭，到錯誤認知根深柢固之後，真係救都嘥氣。
