科技發展一日千里，唔少科幻電影中嘅橋段一一成真。好似航拍機咁吖，唔止早就成真，而且愈來愈普遍添，幾千元就有交易，難怪吸引無數發燒友。不過咁，航拍雖然成為一種潮流玩意，但亦有唔少問題甚至危機，稍一不慎，隨時搞出人命都似。

唔係誇張o既，美國白宮及日本首相官邸就曾經出現危機，呢啲高度戒備嘅政府要地，居然被航拍機輕易闖入，真係講都無人信。雖然只係一場虛驚，但如果涉及恐襲嘅話，後果可大可小。

美日元首官邸保安兒戲，香港嘅政府建築更加係零設防。呢嗱，有發燒友試過喺石壁監獄附近玩航拍機，最近距離只有一百米，結果飛足廿分鐘，都無懲教署人員出來阻止，信號亦完全冇受到干擾，簡直如入無人之境。試諗吓，若然有不法分子藉航拍踩線，你話有咩後果呢？

監獄防衞鬆懈都未夠離譜，最匪夷所思嘅係連軍事重地都可以來去自如。有個發燒友去沙頭角航拍，飛到靠近新圍軍營約一公里範圍，如果唔係失控墜毀，相信已經闖入軍營，問你怕未。

正因為航拍機問題多多，好多國家已經急急補鑊。日本七月通過航空法修正案，限制無人機嘅飛行範圍；美國政府亦要求不同類型無人機要註冊，以便出事時追究責任。即使鄰近嘅台灣，由於101大樓經常被航拍機「空襲」，當地政府立即通過航空法修正案，規定十五公斤以上遙控無人機必須向民航局登記，操作人員亦必須考牌。

反觀港產官僚一直無動於衷，從來無正視問題嘅嚴重性。民航處將消閒航拍機歸類為無線遙控飛機，只限包括機場、大嶼山以及維港兩岸等地方禁玩，而相關條例係喺九十年代訂立，早就不合時宜，等於以明朝尚方寶劍斬清朝嘅官，簡直荒謬。

正如有專家話齋，要防止航拍機入侵政府重地絕非難事，只要加裝信號干擾就得。弊在港產官僚永遠後知後覺，未出事就當無件事啫。再講吖，航拍機喺私人地方自出自入，分分鐘侵犯私隱喇。

冇錯，科技發展日新月異，要及時立法規管確實唔易，問題係，隨住航拍機愈來愈普及，危機與日俱增，如果當局繼續扮鴕鳥，唔盡快立法規管，遲早爆大鑊嘅咋。唔通真係要見到棺材至流淚？叮！