政壇：搞搞政：請洗碗唔知價 鬍鬚曾脫節
喺實施最低工資後，工時長、體力勞動多嘅行業都較難請人，其中飲食業更成為重災區，業界面臨人手長期不足嘅問題。財爺「鬍鬚曾」曾俊華曾經講過，現時市區核心地段嘅洗碗工月薪一萬二千元，但都唔代表有人肯做。香港餐飲聯業協會會長黃家和就認為鬍鬚曾嘅講法太保守，因為現時業界出到一萬五千元都好難請人，暗寸鬍鬚曾同現實脫節、「食米唔知價」！
黃家和：業界人工料增7.5%
黃家和尋日出席一個經濟研討會時話，實施最低工資以來，業界單係人工開支已大增，首年增加百分之十三，次年增加百分之八，估計今年亦會增加大約百分之七點五。雖然人工持續上升，但香港飲食界嘅吸引力反而大不如前，隨着上海、廣州、深圳等鄰近城市嘅硬件已超越香港，香港已失去「美食之都」呢個美譽，加上受到最低工資嘅影響，食客的消費隨之上升，相比之下，吸引力自然減低。
佢又話港人近十年飲食習慣有改變，例如用餐前會先洗碗筷，又多咗用公筷同公匙，有外國朋友見到呢種情況，覺得好得意。但佢話自己近三年嚟出外用餐都唔會特別洗碗筷，因為對業界嘅經營有信心，而且多年嚟，佢嘅健康未有因而受影響。
唔單止飲食界難請人，「新小巴大王」、公共專線小型巴士聯合總商會會長馬僑生就話，小巴業界最少缺兩成多嘅司機，即係十架小巴，便欠兩名司機。
而老年化亦係另一難題，現時小巴司機平均超過六十歲，佢建議當局放寬限制，簡化考牌同牌照互換制度，容許以單程證來港嘅內地新移民做司機，相信有助紓緩司機不足問題。
