多名白鴿黨前成員早前另起爐灶成立嘅政黨「新思維」，組成短短一個月，就已經接連獲多位政府高官接見，繼本月二十一日喺禮賓府同特首梁振英會面後，佢哋六名成員尋日亦獲政務司司長林鄭月娥、政制及內地事務局局長譚志源接見，討論地方行政、政府施政效能同安老事務等問題。政府咁重視新思維，難免令人覺得政府對佢哋特別厚待。召集人Dick狄志遠就否認優待，話自己好有誠意同朋友傾，其他人點睇都好難去估計，除咗政府，其實都有同商界、學術界、宗教界同政黨交流。

稱成員盼加入諮詢架構

阿Dick話司長喺會面時，有關注佢哋政黨發展同理念，對佢哋提嘅建議，亦反應熱烈。不過，佢否認政府高層先後接見新思維係特別優待，仲話自己其實都食咗好多閉門羹，有啲人反應冷淡，惟有主動接觸多啲人，促成理性討論。對於之前有成員講過希望政府委任公職，阿Dick話會面時無講呢個話題，又澄清當時唔係要求公職，而係想加入政府諮詢架構，貢獻社會喎。佢哋暫時對政府都係有讚無彈，盟友角色都幾明顯。

新思維尋日分別就三方面向政府提建議，分別係將十八個區議會重組成八個，以擴大區議會職能；將安老事務委員會升格至扶貧委員會級別，由司長級官員領導，設安老事務專員等。除咗司長，佢哋今個月之內，會同民政事務局見面，商討青年政策，而下月就會約見教育局，討論十五年免費教育。

新思維成立短短一個月，又未有成員係立法會議員，竟然比其他政黨有更多會見官員嘅機會，真係好難怪有人會以為政府有意扶植佢哋，令佢哋發展更快囉！

第一手消息請下載on.cc東網iPhone/iPad/Android/Windows Phone Apps