撞橋事故補鑊遲 後知後覺釀危機

呢，汲水門橋上星期畀躉船撞毀，連同青馬大橋一齊封閉兩粒鐘，赤鱲角機場淪為孤島，近百航班延誤，搞到七國咁亂。難為香港成日自詡國際大都會，一宗小小意外就搞到海陸空交通癱瘓，簡直笑大人個口。冇計喇，機場淨係靠一條大橋連接市區，冇事猶自可，出事必大鑊。

一如既往，港府例牌賊過興兵，尋日召開跨部門會議，運輸及房屋局局長張炳良承認政府部門溝通機制有檢討空間，下次會第一時間通知市民。佢仲話機管局及運輸署正研究一站式資訊平台，發放疏導安排嘅資訊，必要時會開放現時屬機場禁區嘅海天碼頭作緊急用途；而海事處亦會研究進行廿四小時巡邏，喺青馬大橋南北兩端以及汲水門大橋設立預報系統喎。

呢啲咪叫後知後覺囉，撞橋當日港府應變遲緩，夜晚七點幾出事，運輸署拖到九點幾至發布封橋消息，建議市民改搭其他交通工具出入機場，搞到怨聲載道，依家至話溝通機制有檢討空間，遲唔遲啲吖。

其實，開放海天碼頭嘅建議，十年前已經有地區人士提過，點知當局當耳邊風。至於講到預報系統咯喎，更加係唔講猶自可，一講把幾火。根據現行系統，控制室即使收到警報亦唔夠時間應變，只能眼白白睇住大橋捱撞，當局早就知道有漏洞，可惜一直闊佬懶理，冇諗辦法改善，直到最近至開發可以直接通知船長改道嘅新系統。如果唔係港產官僚求求其其，敷衍塞責，今次意外話唔定可以避免■。

當然喇，乜嘢措施都係假，最緊要係拿拿臨興建連接機場嘅替代道路。港府話屯門連接赤鱲角嘅海底隧道一八年落成，日後再發生同類事件，市民可改道由隧道去機場。除咗海底隧道，港府仲計劃興建十一號幹線連接元朗同機場喎。講就好聽嘞，現實係咪咁理想，仲要睇過至知。今時今日，大型基建延誤超支成風，機場替代道路會唔會又係好事多磨，冇人話得埋。

咪話太一叮唔提醒，今次大橋只係輕微損毀，已經搞到七國咁亂，萬一下次發生更嚴重意外，你話點算呢?唔該港產官僚做好自己份工，否則有乜冬瓜豆腐，「官到無求膽自大」都冇用吖，叮！