城中鏡：邢嘉倩讚兩媽媽唔怕羞
邢嘉倩尋日為佢同爸爸邢李（火原）成立嘅慈善基金拍攝宣傳照，談及繼母林青霞內地真人騷《偶像來了》，佢話：「成個騷都幾搞笑，佢演得好放鬆，佢係好搞笑o既人，佢表現番自己性格，做番自己。佢冇叫我一齊上節目，因為佢都拍得好辛苦，冇得（目訓），唔想騷擾佢o地製作進度。」
邢嘉倩話會親手整蛋糕，賀繼母林青霞生日。
Lisa S.好誠實咁同Ana R.講照顧BB係又累又緊張。
提到兩位媽媽張天愛同林青霞一樣才華洋溢，問佢有冇考慮投身幕前？佢直言：「做唔到，係佢o地好唔怕羞！（邊個？）兩個都係。」至於林青霞下月生日，佢表示會親手整蛋糕：「整個比上年靚嘅蛋糕，上年六十歲太大個，今年會整番細啲。」談到近況，佢話依家忙於教育同教育投資。咁熱愛教育，咁幾時到佢做媽咪？佢坦言：「As soon as possible，依家呢個年代唔一定結o左婚先，可以做媽咪先。只要拍拖開心，對父母嚟講係最重要，唔介意有冇簽紙，有冇婚戒。」
同場嘅名模Lisa S.講到好友Ana R.早前舉行baby shower，話為Ana R.興奮：「我答應過等佢生完先返美國，但我趕住返去，所以希望佢唔好太遲生！」問到有冇分享湊B心得？佢雀躍地說：「絕對有，我唔想嚇佢，但我好誠實咁同佢講照顧BB係又累又緊張。我就開刀生，因為Raven（女兒）唔轉身，要開刀先得。我好佩服佢咁勇敢可以自然生，我就好驚，對我嚟講好瘋狂！」
