城中鏡：鬥快行善
慈善組織小母牛日前喺科學園舉辦年度大型籌款活動「競步善行」，唔少城中名人都有參加，香港工商總會主席王庭聰到場做啦啦隊為參賽嘅家人打氣。講起近期騙徒手法層出不窮，王庭聰話平日一聽到可疑電話就會單刀直入問對方究竟想搵邊個，如果對方o依o依哦哦，佢就會直接收線。不過，佢有幾個朋友就試過被騙十萬、八萬元，都係因為關心朋友心切，結果不幸被騙。
吳安儀（左）同張詩培與小母牛吉祥物合照。
王庭聰（後右二）做啦啦隊支持家人參與競步善行。
葉澍堃（右）賽前幫家人拍下起步一刻，左為杜振源。
桌球天后跑步練耐力
小母牛香港籌款委員會主席杜振源就話，慶幸咁耐以嚟都冇聽過有人假冒佢哋去做慈善活動騙財，而小母牛向來有一班長期固定嘅善心支持者。不過，現時零售市道較差，佢希望今年全年籌款目標可達四千萬元，能夠同舊年相若就好滿足喎。
同場仲有世界女子桌球冠軍吳安儀、香港壁球代表歐詠芝及歐鎮鉻、前高官葉澍堃一家大細、佳能高級副總裁鄧慶治同潮州商會會董張詩培等人。吳安儀話雖然桌球唔使跑步，但佢平時都會跑步練體力同耐力，因為一場桌球比賽往往可以打好耐，需要高度集中。歐詠芝同歐鎮鉻兩姊弟則隨時做足準備，話打壁球時都跑來跑去，一公里對佢哋嚟講可謂濕濕碎。
葉澍堃當日就無落場，見佢拎住部相機逼喺記者堆中穿梭，原來佢負責做攝影師，拍低太太、家人同好友起跑嘅一刻，當然更重要係打氣支持啦。鄧慶治話阿仔忙住上海新店試業工作，新抱下月就係預產期，所以佢獨自捧場。
