政壇：每周之星：至叻星：金刀梁安撫勞委 研增工資線拆彈

為免標準工時委員會六名勞方委員集體跳船，到咗最後關頭，標委會喺前日開會時突然擴大工資線研究範圍，由原訂上限月入一萬五千元調升至月入二萬五千元，獲保障嘅打工仔人數倍升至約一百八十萬人，勞方委員即時表示歡迎。今次嘅讓步，標委會主席「金刀梁」梁智鴻算係暫時拆彈，但勞方委員又表明若訂立標時方案進度唔理想，唔排除會再度考慮集體退出標委會，面對勞方委員再次脅迫，谷到一肚氣嘅資方委員隨時會爆煲，甚或反枱唔傾，點樣可以令到勞資雙方就方案達成共識，就要睇金刀梁嘅政治手腕嘞！