政壇：張信剛講一帶一路 要有文化
「一帶一路」係全球經濟焦點之一，同時亦令唔少人對於去絲綢之路旅遊產生興趣。城市大學前校長張信剛係絲路嘅專家，自退休後鮮有在香港露面，但尋日就帶埋太太去公開大學主講絲路經歷。佢話一九六三年首次去絲路，當年由台灣經香港，到泰國、約旦、埃及，當年都唔覺得危險，反而依家有恐怖分子就覺得危險。
張信剛話發展一帶一路，要尊重對方嘅歷史同文化。
張信剛至今已去過幾十次絲路，通常太太都陪住佢去，最鍾意係中亞一段，因為嗰度人口較集中，亦係絲路嘅必經之路，又建議初去絲路嘅人，可以去國內嘅一段，即係敦煌等地。
去過咁多次絲路，張信剛就最有資格講「一帶一路」嘞！佢話中國要發展一帶一路，必須着重經濟、學術同人才，要知道對方學乜嘢、諗乜嘢，先能夠同人打交道。至於邊個能夠掌握一帶一路嘅先機呢？一部分係視乎經濟實力，但相當重要係視乎文化力量，睇吓對方鍾唔鍾意你嘅文化，你又係咪理解對方嘅文化，並尊重對方嘅歷史同文化，否則就係犯咗過去殖民主義嘅錯誤。
