政壇：EQ廁所跣低 需中醫針灸
立法會議員EQ葛珮帆最近力推器官捐贈，唔知係咪太上心不斷「諗嘢」，尋日朝早喺立法會大樓內嘅女廁跣倒受傷。EQ話尋日朝早立法會六樓女廁水浸，地面上有一大攤水漬，佢一不留神就不慎跣倒，當時左膝跪地，所以留下瘀傷，又懷疑扭傷咗膊頭同腰骨。雖然傷勢唔算太嚴重，毋須送院，但佢下午要去睇中醫，並進行針灸療傷。
葛珮帆尋日朝早喺立法會女廁跣倒，要睇中醫針灸療傷。（受訪者提供）
EQ續說，佢當時隨手攞咗一張白紙寫上「壞」字，仲貼喺女廁門外，避免其他議員同職員受傷。另外，人民力量議員陳偉業尋日朝早喺立法會續會時曾要求點算法定人數，又指保險界議員兼財務委員會主席陳健波「成朝唔見人」，要打電話叫佢返立法會開會。雖然EQ受咗傷，但仍然可以立即彈起身，反駁陳偉業嘅說法唔恰當，因佢較早時間曾經見過陳健波喺立法會。莫非EQ為自己友護航，已忘記痛楚？
