政壇：入境處獲嘉許牌匾 竟係雍正後人墨寶
申訴專員嘉許獎自九七年設立，表揚提供優質服務同有效處理投訴嘅公職人員同機構。今年大獎得主係入境事務處，而獲頒嘅嘉許牌匾更大有來頭。咪睇牌匾只係簡單寫上「香港申訴專員公署申訴專員嘉許獎」，其實係出自雍正後人、書法家啓功嘅手筆，非常珍貴。
申訴專員劉燕卿（右二）向陳國基（左二）頒發嘉許牌匾。
申訴專員公署話得獎機構只能保存牌匾一年，一年後要交還再頒予下屆得獎者或機構，做法好似世界盃一樣。不過，牌匾外框會鑲上小金牌，記錄歷屆得獎者或機構名稱。睇嚟入境處就算唔能夠永久保留牌匾，大家會知道佢哋已四奪大獎。
入境處處長陳國基就話，點樣處理牌匾係一個大問題，需要開會討論先決定到，但大原則係希望畀最多同事見到個牌匾，因為獎項係對部門嘅大鼓舞。要保管如此珍貴嘅墨寶一整年，有任何損壞都好大鑊，陳國基就笑稱，唔見咗就要入境處年年奪獎先得，希望安排到最好嘅處理方法啦！
