政府最近刮起一股遲來嘅社交網站facebook（fb）風，好似特首CY梁振英、教育局局長「吳得掂」吳克儉都先後開設咗個人fb帳戶。但部分政府高官仍未有fb帳戶，佢哋唔開fb嘅原因大致可分兩類，包括本身政策局已有fb專頁，或係太忙無此計劃。到底係因為上述理由抑或係擔心受到網民攻擊，就真係局長們自己先知嘞！

據了解，現時保安局局長黎棟國、公務員事務局局長張雲正、發展局局長「波波」陳茂波同民政事務局局長劉江華暫時未有開設個人fb帳戶，前兩者有可能因為局方涉及太多敏感資料，所以唔方便使用fb。

至於波波做立法會議員時已有fb，但自擔任局長後就好少用嘞，只有朋友標籤佢出席活動嘅內容；加上發展局早喺一三年三月已開設fb專頁，而且不時更新，可能因此毋須跟大隊開多個fb專頁。

運房局孭炸彈無心情玩

此外，有高官一早揚言唔會開設fb，好似食物及衞生局局長高永文、運輸及房屋局局長張炳良就因為所屬範疇太多工作，冇空閒時間打理。食衞局回應話該局對開fb持開放態度，該局政治助理亦不時喺個人fb宣傳同所屬政策局有關嘅活動。至於運房局現時就「孭」咗幾個計時炸彈在身，包括高鐵超支同延誤、港珠澳大橋、食水含鉛同汲水門大橋撞橋意外等，相信局長都無心情玩fb嘞！

雖然吳得掂所屬嘅教育範疇最近亦問題多多，但佢依然非常淡定，仲不時喺fb上載個人的近況。其實有部分官員係因為局方無fb專頁，所以先要自己開一個，但佢哋都樂在其中，好似財爺曾俊華、商務及經濟發展局局長蘇錦樑都係活躍分子。講到底，fb只係一個接觸各界人士嘅媒體，唔用fb仲有好多選擇，夠膽落區接觸市民相信更吸引媒體報道同喺社交網站轉載。

第一手消息請下載on.cc東網iPhone/iPad/Android/Windows Phone Apps